Ginpasalig sang hepe sa Bacolod Police Station 10 nga pasanyugon pa sang mga ini ang Police visibility sa ila nga area of responsibility, partikular na sa Economic Highway.
Madumduman nga ginmando ni acting Bacolod City Police Office (BCPO) director P/Col Noel Aliño ang pagpasanyog sang Police visibility agud matapna ang pagpanghaboy sang mga bangkay kasubong man sang mga utod nga bahin sang lawas sa syudad.
Samtang may nasapwan naman nga bangkay ang mga kapulisan sa sulod sang isa ka tamburong sa Economic Highway sa Barangay Cabug, Bacolod City sang Mayo 2.
Sa interview sang Bombo Radyo Bacolod kay P/Maj. Richard Fajarito, station commander sa Bacolod Police Station 10, iga-maximize nila ang mga police personnel sa mga lugar nga masami ginatipunan sang mga tawo.
Samtang 24 oras man ang patrolling nga ginabuhat sa Economic Highway kun sa diin may-ara na sang ginhamtang nga Police Outpost.
Magluwas pa sa presensya sang kapulisan, nagakoordinar man sila sa mga Barangay sa pag-augment sang mga Barangay Tanod, apang nahangpan naman sini nga madamo sang indi pa makapadala bangod iban sa mga ini ang masako pa sa mga ginapatigayon nga fiesta.
Samtang mas ginapasanyog naman sang Bacolod Police Station 10 ang pagpatrolya sa gab-i bangod may mga bahin sa Economic Highway nga madulom, gani malikawan ang kaangay sang nagligad nga insidente sang pagbilin sang bangkay.
Sa pihak nga bahin, panawagan naman sang hepe sa mga pumuluyo nga apisar yara ang presensya sang mga kapulisan, indi gihapon dapat nga magpakampante kag magpabilin gihapon sa paghalong.
Samtang ginapasalig naman sini sa publiko nga wala sang dapat kahangaw-an sa paglabay sa Economic Highway bangod ang lugar ang gina-unayan na sang mga kapulisan.
