May yara na sang tatlo ka persons of interest ang Bacolod City Police Station 10 sa nagtiro sa katapo sang Philippine Army sa Barangay Handumanan, ciudad sang Bacolod,kahapon, alas 12:20 sang kaagahon.
Ang biktima ang ginkilala nga si Army Corporal Jasper Romas Gancia 34 anyos, residente sang Brgy. Bata, siudad sang Bacolod kag isa ka katapo sang Philippine Army nga naka-estasyon sa 8th Scout Ranger Camp Ranao, Marawi City.
Ang insidente nagluntad sa gwa sang gate sang Deca Homes Subdivision, Purok San Roque, Barangay Handumanan, ciudad sang Bacolod, kun sa diin naggwa ang amay sang nobya ni Gancia nga si Teodoro Tuvilla, 70-anyos para magbakal sang sigarilyo.
Nasugat-an ni Teodoro ang tatlo ka mga suspetsado kag namangkot ini kun sa diin siya mahimo nga makabakal sang sigarilyo apang siya ang ginsabat sang pabalang.
Hinali na lang nga may nagluntad nga argumento kag amo na nga naggwa si Gancia apang hinali lang ini nga ginluthang sang mga suspetsado.
Gilayon man nga nalagyo ang mga suspetsado sa wala nahibaluan nga direksyon.
Sa interview sang Bombo Radyo kay Pcapt Lelanie Lagoting, Hepe sang Police Station 10, yara na sa estable nga kondisyon si Gancia apang under observation nga natalana nga ipaidalom sa operasyon.
Suno kay Lagoting, may yara na sang tatlo ka persons of interest sa nagtiro sa katapo sang Philippine Army kun sa diin duha diri ang na-identify na.
May yara naman sang ginbutang nga curfew alas 10:00 sang gab-i bangod nga madamo sang nagatambay sa area.
