Ginalantaw sang Bacolod Police Station 10 nga wala na sa ila nga area of responsibility ang gina-alegar nasiplatan nga armado nga grupo nga ginalantaw mahimo rebelde nga New People’s Army (NPA).
Sa interview sang Bombo Radyo Bacolod kay Police Captain Sherwin Galupar, station commander sang Bacolod Police Station 10, ginpasanyog nila ang security kag nagplastar sang mga precautionary measures sumugod sang nareport ang sightings sang armado nga grupo.
Ini ang nasundan pa sang mga makaduluda nga persona nga nagalibot-libot sa area nga indi man maplastar kun sa diin nagikan kag kun ano ang tuyo.
Sa paglantaw sang mga ini ang hulag sang nasambitan nga mga persona ang kaangay sa surveillance activities sang mga NPA.
Aminado si Galupar nga dako ang tyansa nga wala na sa ila nga lugar ang armado nga grupo bangod ini ang wala makit-an.
Apang pasalig sini nga bisan wala na sa ila area ang ginapatihan NPA, sila ang nagapabilin nga alerto.
Panawagan man sang mga ini sa mga pumuluyo sa Barangay Handumanan kag Felisa nga indi magkampanti, manilag kag kun may mamutikan nga makaduluda nga mga persona nga bag-o sa lugar, gilayon nga ireport sa kapulisan.
