Ginklaro sang Bacolod Police Station 2 nga indi kawatan ang person with disability nga nakuryente sa overpass sa Lacson Street, Brgy Mandalagan, Bacolod City kahapon.
Sa interview sang Bombo Radyo Bacolod kay Police Captain Andrew Maapni, officer in charge sang Bacolod Police Station 2, ang biktima ang ginkilala lamang nga si Alyas Tom, kumpol ang nawala nga tiil, kag nagaserbe nga dispatcher.
Ginpahayag ni Tom nga ini ang nagpasilong lamang sa overpass bangod sa ulan.
Nakita sini ang tubo nga half inch ang kalaparon kag nagalaba sang 7 to 8 inches nga nakasablay sa kuryente, gani ini ang iya ginhunos agud indi mabungguan sang iban.
Apang ang tubo ang nakabunggo sa primary line sang Negros Electric and Power Corporation (NEPC) kag naglatay ang kuryente nga nagresulta sa pagka kuryente ni Tom, nga nag-agom sang minor burns.
Suno kay Maapni, may mga naggwa nga mga pahayag nga si Tom ang nagapangawat sang kuryente.
Apang ang kapulisan ang nagapati sa sugid sang PWD, bangod indi man ini makapangawat sang kuryente nga wala dala sang gamit kaangay sang pliers.
Dugang pa nga si Tom ang may record man sa pag-uli sang nakita sini nga wallet.
Sa karun estable na ang kondisyon sang biktima, nga ginabulong sa Corazon Locsin Montelibano Memorial Regional Hospital.
