Nagalaom ang Bacolod Police Station 2 nga maenhance ang footage sang CCTV camera nga nakacapture sang mga suspestado nga nagpatay sa miyembro sang Aki Cuadra Robbery Group sa Purok Sigay, Barangay 2 sang Miyerkules sang gab-i.
Suno kay Police Lt. Jonito Pastrana, deputy station commander sang Bacolod Police Station 2, wala sang witness sa krimen nga nagpangisog nga maghatag sang impormasyon sa imbestigador angot sa iya nga nasaksihan sang ginpatay si Donald Joseph Casiano nga residente sang Glendale Homes, Barangay Granada.
Sa karon, wala pa napagwa sang Scene of the Crime Operation ang ila nga report angot sa igo ni Casiano apang base sa numero sang basiyo sang caliber .45 pistol nga narekober sa crime scene, ginalantaw nga lima ang igo sini sa lawas.
Suno kay Pastrana, wala si Casiano sa balay nga ginrentahan nanday Arnold ‘Aki’ Cuadra sa Villa Homes, Barangay Vista Alegre sang nagsulod ang mga lalaki nga nag-abduct sa mga ini sang Enero 8 apang ang Toyota Wigo nga dala ni Casiano sang nagkadto ini sa Purok Sigay sang Miyerkules sang gab-i ang nasiplatan man sa lugar kun sa diin nasapwan ang bangkay ni Aki Cuadra sa Barangay Villamonte kag sa katubuhan sa Sitio Langob, Barangay Blumentritt, Murcia kun sa diin nasapwan ang bangkay sang magpakaisa nga sanday Jhundelle kag Leonil Rafols.
