Nagapanawagan ang station commander sang Bacolod Police Station 2 sa mga may impormasyon sa posible nga mga ginikanan sang lapsag nga lalaki nga napatay matapos ginbilin sa 24th Street, Barangay 1, Bacolod City sang tinalikdan nga semana.
Sa interview sang Bombo Radyo Bacolod kay Police Major Eugene Tolentino, ang lapsag ang nagapabilin sa ABE funeral homes kag napahibalo naman nila ang Barangay kag nakadepende na sa mga ini ang pagpalubong sang lapsag.
Suno kay Tolentino madamo sang mga CCTV sa lugar nga ginapanag-iyahan sang private establishments apang indi man makita kun sin-o ang nagbilin sang lapsag bangud malayo kag madulom ang lugar.
Padayon sa karun ang imbestigasyon sang mga kapulisan agud matumod ang mga ginikanan sang lapsag ukon ang responsable sa pagbilin sini sa nasambit nga lugar.
Madumduman nga ang lapsag nga lalaki ang nasapwan nga wala na sang kabuhi sang manug-scrap sa 24th Street, Barangay 1, Bacolod City sang Nobyembre 10 sang gab-i.
