Ginpahayag sang station commander sang Bacolod Police Station 3 nga wala pa nila natumod ang suspek nga nagpatay kay Francis Mark Rito kag wala pa sila sang natumod nga motibo sa pagpatay.
Suno kay Police Capt. Armilyn Vargas, may yara na sila sang iga-check nga CCTV footage agud nga matumod ang suspetsado.
Paathag ni Vargas nga indi pa nila mapalayag ang motibo sa pagpatay apang madamo na sila sang ginalantaw nga anggulo santo sa ila imbestigasyon.
Ginpahayag man sang station commander nga ang biktima ang suspetsado man sa pagpatay kay Yuki Castro sa Barangay Bata sang tinalikdan nga Abril 2, 2022 apang wala na ginpasakaan sang kaso sang pamilya sang biktima.
Suno pa sa station commander ang biktima kag si Castro ang lunsay mga drug personalities kag kasubong man nga kabahin sa drugs watchlist sang Bacolod Police Station 3 si Rito.
Suno kay Vargas ginhimo man nila sadto ang ila nga bahin humalin sa pagproseso sang papeles tubtob sa pagpanotaryo sang mga ini agud kuntani mapasaka ang kaso batok kay Rito apang wala gindayun sang amay ni Castro ang kaso.
Wala naman sang witness nga nakakita sa nagtiro kay Rito apang ang mga tawo sa palibot ang nakabati sang lupok sang armas-luthang.
Ginalantaw man nga sa Abkasa nagatrabaho si Rito bangud nagpangape pa ini sa lugar antes magluntad ang insidente kag ini ang may dala nga gamit sa pagpamanday.
Nagapanawagan man si Vargas sa tanan nga nakakita sa nagtiro-patay sa biktima nga indi magpangduha-duha nga maghatag sang impormasyon sa mga kapulisan agud nga mahatagan sang hustisya ang kamatayon sang biktima.
