May nakuha na nga mga CCTV footages ang Bacolod City Police Station 3 may kaangtanan sa pagpatay kay Lino ‘Dodoy’ Cuadra sa northbound terminal sa Barangay Banago, ciudad sang Bacolod sang Marso 12.
Suno kay P/Maj. Richard Fajarito, station commander sang Bacolod City Police Station 3 nga nakakuha sila sang CCTV footages gikan sa City Disaster Risk Reduction Management Office kasubong man sa CCTV sang terminal.
Pahayag pa sini nga klaro kuntani ang pag-capture sang CCTV footage sang CDRRMO apang ang makita lang amo ang brand sang salakyan kag duga sini kag indi na makita ang plaka sang salakyan.
Santo sa CCTV footage, ang salakyan sang mga suspetsado ang isa ka Innova nga salakyan nga nagaduag sang pula.
Samtang indi naman athag kag madulom ang kuha sang CCTV camera sang terminal nga gindugangan pa nga nagatiyog ini gani wala makuhaan ang aktwal nga pagpangluthang.
May kabudlayan naman sa pagtrace sang salakyan bangod madamo ini sang kaangay nga model kag duag.
Madumduman nga santo sa inisyal nga imbestigasyon indi magnubo sa duha ang nagtiro kay Cuadra bangud indi magnubo sa 20 ka fired cartridges ang nakuha sang Scene of the Crime Operatives sa crime scene.
Sang natabo ang krimen suno sa station commander, yara sa Ceres Terminal ang pila ka beat patrollers apang wala na nila nalagas ang Toyota Innova nga ginsakyan sang mga suspetsado bangud nag-ulan kag wala man sang masakyan ang mga pulis.
Ginalantaw naman ang posibilidad nga may kaangtanan ang pagpangluthang sa pagkaulamid sini sa shooting incident nga natabo sa beerhouse sa Goldenfields Commercial Complex sang 2012 nga nagtuga sang pagkapatay sang duha ka mga kapulisan.
