Nagapasalamat ang station commander sang Bacolod Police Station 3 sa mga witness nga nagbulig agud nga matumod kag mapasakaan sang kaso ang mga suspetsado sa apat ka shooting incident nga nagluntad sa ciudad sang Bacolod.
Sa interview sang Bombo Radyo Bacolod kay Police Captain Rondyl Tapang, ang suspect sa shooting incident sang Setyembre 3 ang nadakpan paagi sa hot pursuit operation sa ciudad sang Sipalay kag ini ang ginserbehan man sang iya standing warrant kag ini ang nakahunong na sa karun sa BJMP-Kabankalan.
Suno kay Tapang, case-closed na ang nasambit nga shooting incident kag nafile na sa fiscals office ang kaso nga frustrated homicide.
Natumod na ang suspetsado sa shooting incident sa Purok Langis, Barangay Banago kun sa diin nasal-an lamang ang biktima kag apisar nga at-large ang suspect, na-file na ang kaso nga homicide.
Samtang napasakaan naman sang kaso ang natumod nga suspect sa shooting incident sa Bangga Pepsi, Barangay Bata.
Dako ang pagpasalamat sini sa mga witnesses nga nagpangisog agud nga magbulig sa pagtumod sa mga suspetsado agud nga mapasakaan sang nagakaigo nga kaso.
Ginpasiguro man sang mga kapulisan ang safety sa mga witnesses.
Suno kay Tapang, indi dapat madaog sang kahadlok ang mga pumuluyo kun may yara sang nasaksihan nga krimen kag magkooperar sa imbestigasyon sang mga kapulisan.
Suno pa diri, bisan indi ang pamilya mapasaka sang kaso batok sa suspect, kun may kooperasyon ang witness sa mga kapulisan sarang nga mapasaka ang kaso.
