Ginapangita pa sang mga pulis ang apat ka mga inmate nga nakapalagyo nagikan sa Bacolod City Police Station 3.
Suno sa rekord sang Bacolod City Police Office, naggamit ang mga inmate sang lagari agud utdon ang kabilya sa selda kag makagwa ang mga ini kaina sang kaagahon.
Suno sa duty jailer nga si Police Staff Sergeant Eric Olverio kag desk officer nga si Police Corporal Orwayne Jade Nadado, natukiban nila ang jail break alas-12:25 sang kaagahon.
Kalakip sa mga nakapalagyo amo sanday Sunny Capa kag Ely Lorence Sazon sang Purok Mahimulaton, Barangay Banago, Bacolod City; Michael Peñoso sang Purok Sigay, Barangay 2, Bacolod City; kag Jeffrey Elangos sang Purok Riverside, Barangay Banago, Bacolod City.
Santo sa rekord sang Police Station 3, sanday Capa, Sazon kag Peñoso ang nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002; samtang si Elangos naman ang nagapangatubang sang kaso nga paglapas sa Republic Act 7610 ukon Anti-Child Abuse.
Gilayon naman nga nagpatigayon sang manhunt operations ang mga pulis agud matultulan ang mga pugante.
