Ginahulat pa sang Bacolod Police Station 4 kun magafile sang kaso ang ciudad sang Bacolod sa gina-alegar lima ka persona nga nagpanggabot sang mga tanom sa kilid sang dalan sa gwa sang Bacolod City Government Center.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 4, ang pagpanggabot sang mga tanom ang natabo kapin alas-10:00 sang aga sang Hunyo 12, Independence Day.
Nagpablotter sa ila estasyon ang Public Order and Safety Office (POSO) personnel nga ginkilala nga si Hazel Kate, nga amo ang nagabantay sa BCGC.
Suno diri, may lima ka mga persona nga nagpanggabot sang mga tanom sa kilid sang perimeter fense sa dalan.
Sang ginpamangkot, ginpahayag nila nga sila ang tawo ni Mrs Portia Familiaran, ang asawa ni outgoing Bacolod City Vice Mayor El Cid Familiaran.
Ginsakay na sang mga ini sa gamay nga canter truck ang mga tanom, apang ila man balik nga gintanom sang sila ang ginhambalan sang personnel sang Bacolod City Legal Office kag POSO, bangod sila ang wala sang napakita nga clearance ukon permission.
Nakadepende pa sa Bacolod City Legal Office kun sila ang may makita nga rasun sa pagpasaka sang kaso ilabi na nga nauli man ang mga tanom.
Suno kay Bonilla, kinamatarong man sang ciudad kun sila ang magfile sang reklamo.
