Wala pa natumod ang suspek sa nagtiro-patay sa isa ka negosyante sa gwa sang convenience store sa tabok sang Barangay Hall sa Barangay Estefania, ciudad sang Bacolod kahapon.
Madumduman nga gintiro-patay sang duha ka mga wala makilal-an nga suspetsado ang negosyante nga biktima nga si Elson Casalan Cepeda, 49 anyos, residente sang East Homes 2, sa nasambitan nga Barangay.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, nagapadayon ang ila nga pagtipon sang impormasyon agud nga matumod ang mga suspect kasubong man ang motibo sa pagpatay sa biktima.
Suno kay Depasucat, nakig-angot na sila sa pamilya sang biktima apang nahangpan man sini nga yara pa ang mga ini sa kasubo, shock kag trauma.
Nagalaom man ini nga may yara sang mag gwa nga witness agud nga makabulig sa pagsolbar sang kaso.
Suno pa sa station commander ang mga business establishments nga yara sa natabuan sang krimen ang may CCTV cameras apang wala naga-function.
Sa karun, napadayon ang ila imbestigasyon kag sa tion nga mag-abot na ang resulta nagikan sa examination nga ginpatigayon sang Scene of the Crime Operation (SOCO) agud nga makapatigayon sila sang cross matching sa mga gingamit nga armas-luthang sa nagligad nga mga shooting incidents.
