Magapatigayon sang parallel investigation ang Bacolod Police Station 5 sa alegasyon nga nakasulat sa papel nga nakaapid sa utod nga kamot nga ginbilin sa Zone 3, Ilang-Ilang Street, Purok Riverside, Barangay Bata, Bacolod City kahapon sang aga.
Isa ka tricycle driver nga si Bonbon Jamandre nga residente sang Zone 1, Purok Riverside, Barangay Bata ang nakakita sang kamot nga ginapatihan iya sang babayi.
Nakabutang man sa tupad sini ang isa ka bond paper nga may nakasulat nga “ANTHONY ” TATA” VISTAR PUSHER , PROTECTOR, KAWATAN!!!! PANGHULIDAP IMU OBRA!!!! BULANG PA MORE AH!!!!.
Sa pag-imbestigar, natumod nga si Police Staff Sergeant Anthony Vistar nga assigned sa Bacolod Police Station 5 ang TATA VISTAR nga yara sa sulat kag siya ang assigned sa Station Drug Enforcement Unit.
Sa interview sang Bombo Radyo kay Police Captain Francis Depasucat, station commander sang Bacolod Police Station 5, temporaryo nga ginrelieve sa iya designation si Police Staff Sergeant Vistar samtang nagapatigayon sila sang validation kag imbestigasyon.
Suno kay Depasucat, kun matuod gid man ang alegasyon wala ini ginatolerar sang kapulisan apang posible suno sa iya nga ginaubrahan lang ini sang istorya sang mga grupo nga nagahimo sang illegal agud maguba ang imahe sang kapulisan.
Suno sa iya, sang iya ginpamangkot si Vistar, ginpanginwala sini ang alegasyon sa iya kag bilang hepe, nakit-an sini ang pagtrabaho sang iya tawo kag wala siya sang may nabatian nga malain nga background ukon involvement sini sa illegal nga aktibidad.
Hugot nga nagapanindugan si Depasucat nga nagatrabaho lamang sang iya ulubrahon si Vistar, nga masobra napulo ka tuig na sa serbisyo kag posible nga pagpangguba lamang ang alegasyon sa iya.
Nagapanugyan ini sa mga kapulisan nga padayon lamang sa pag-ubra sang ila responsibilidad kag maghalong.
