Ang biktima ang isa ka maintenance personnel sang Higher Ground Farm sa Barangay Alangilan kag ini ang gintiro samtang nagamaneho sang iya motorsiklo sa nasambit nga barangay.
Nakaagom ang biktima sang pilas sa ulo kag sa iban pa nga bahin sang lawas.
Narekober sa lugar sang insidente ang bala sang caliber .45 pistol.
Apang wala sang witness sa nasambit nga pagpangluthang bangod tuman ka lapad sang lugar kag tumalagsahon lang may nagalabay sa natabuan sang insidente.
Wala man sang may nakabati sang lupok sang armas luthang.
Pahayag sang live-in partner sini nga may apat ka katrabaho ang biktima kun sa diin sila ang may indi pag-intindihanay.
Ang apat ang ginpatawag naman sa Bacolod Police Station 5 kag ginpaidalum sa imbestigasyon.
Boluntaryo man nga nagsugot sa pagpakuha sang paraffin test ang apat agud mapamatud-an nga sila ang inosente sa krimen.
Suno kay Masangkay, lunsay may mga alibi man ang apat kung sa diin sila sang tion nga nagluntad ang insidente.
Sa karun wala pa sang matumod nga motibo sa krimen ang Bacolod Police Station 5 bangud wala man sang nabatun nga pagpamahog ang biktima kag wala man ini sang kontra.
