Pagahulaton na lang sang Bacolod Police Station 6 kun ano man ang mangin desisyon sang Lupong Tagapamayapa sang Barangay 30, Bacolod City sa pulis nga ginreklamo nga nangastigo sang duha ka menor de edad nga lalaki sa Purok Mabini, Barangay 30, Bacolod City sang Hulyo 10.
Nahibaluan nga ang ginareklamo nga si Police Staff Sgt. Harry Gonzaga ang nakit-an sa CCTV camera nga nanumbag, nanindak kag nangbunggo sang ulo sang duha ka menor de edad nga 12 kag 13 anyos.
Sa interview sang Bombo kay Police Captain Dax Santillan, station commander sang Bacolod Police Station 6, ila nga hulaton ang desisyon sang Barangay 30 sa pagpamuno ni Punong Barangay Jan Mark Petierre, nga suno diri, ini nga insidente ang i-settle anay sa barangay sa ginalauman nga mahatagan sang hustisya ang duha ka bahin.
Suno diri, iya ginarespeto ang desisyon sang barangay kag ang kapulisan magahulat sa resulta sang ila paghinun-anon kag maga-assist kun luyag sang pamilya sang menor de edad kun magpasaka sang kaso.
Pahayag ni Santillan, sila magahulat kun ini bala pasakaan sang kaso ukon ma-settle na lamang sa barangay agud malikawan nga magka-conflict pa.
Suno kay Santillan “police is the protector of the citizen and not the abuser” kag yara ang kapulisan para mag-assist nga wala sang gina-apinan.
