Ginpahayag sang Bacolod Police Station 7, nga ginturn-over sang onse anyos nga bata nga lalaki ang 11 ka sachet sang suspected shabu sa Abada Escay, Brgy Vista Alegre, Bacolod City kahapon sang hapon.
Ini ang lain sa una nga ginpahayag ni Barangay Kagawad Elizalde Benedicto sa Bombo News Team nga ginhaboy sang bata ang suspected shabu sang makita ang mga opisyales sang Barangay.
Pahayag ni Benedicto nga ginpulot sini ang mga suspected shabu kag ginturn-over sa Bacolod Police Station 7.
Apang sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, ginklaro sini nga sa pagbatun sang 11 ka sachets sang shabu, ginpahayag nga ginturn-over mismo sang bata ang mga sachet sa Barangay Kagawad.
Gindala na ang suspected shabu sa crime laboratory.
Kun mapamatud-an nga positibo nga droga, sila ang magapatigayon man sang imbestigasyon sa kun paano nakuha sang bata ang droga.
Hibaluon man sang kapulisan ang background sang pamilya sang bata.
Irefer man nila ang bata sa Department of Social Services and Development.
Gindayaw man ni Santillan ang ginhimo nga pagturn-over kag ginakilala sini ang aktibo nga pagpakig-away sang Barangay Vista Alegre sa illegal nga droga.
Panawagan sang hepe sa mga ginikanan nga tutukan ang kabataan, agud indi magsulod sa illegal nga aktibidad.
Samtang…ginpahayag sang Barangay Kagawad sa Barangay Vista Alegre, Bacolod City nga ginahulat pa nila ang mangin resulta sang test sa crime laboratory sa ginturn-over nga suspected shabu nga nakuha gikan sa onse anyos nga bata nga lalaki.
Madumduman nga ginturn-over sa Bacolod Police Station 7 ang 11 ka sachet sang suspected shabu nga nagikan sa onse anyos nga lalaki sa Abada Escay, Barangay Vista Alegre.
Sa interview sang Bombo Radyo Bacolod kay Barangay Kagawad Elizalde Benedicto, ginpapauli man nila ang bata matapos ang pagturn-over.
Kun mapamatud-an nga matuod nga illegal nga droga ang nakuha sa bata, ila man nga ipatawag ang mga ginikanan sini.
Suno kay Benedicto, indi residente sa Abada Escay ang bata sa baylo ini ang may tiya kag magulang sa lugar nga masami sini ginabisitahan.
Ini ang may ginapulian man sa Brgy Singcang-Airport bangod ang mga himata sang bata sa Abada Escay ang mga ginrellocate lamang gikan man sa Brgy Singcang-Airport.
Indi paman nila kumpirmado kun matuod nga separado ang mga ginikanan sang bata kag ini ang nagapuyo lamang sa mga himata, kag ini ang ila pa usisaon.
Dugang pa ni Benedicto nga kinahanglan man niya makakuha sang contacts nga matawagan inkaso maggwa na ang resulta sang test sa crime lab.
Apang ang desisyon sa masunod nga tikang ang ginasalig na ni Benedicto kay Punong Barangay Lindy de Leon.
Sa pihak sini, nagapanawagan si Benedicto sa mga durugista nga untatan na ang paggamit sang mga kabataa sa illegal nga buluhaton. Samtang, nagpasalig ang Department of Social Welfare and Development nga sila ang magapatigayon sang intervention inkaso matumod nga positibo ang suspected shabu nga nakuha gikan sa 11 anyos nga lalaki sa Abada Escay, Barangay Vista Alegre, Bacolod City kahapon sang hapon.
Sa interview sang Bombo Radyo Bacolod kay DSSD Head Dr. Ritchelle Verdeprado-Mangga, ginahulat pa nila ang resulta sang test sa crime laboratory.
Kun makagwa na ang result kag matumod nga lehitimo ang 11 ka suspected shabu gikan sa bata, amo palang masuguran ang imbestigasyon.
Sa pihak sini, ang DSSD ang nagapakig-angot man sa ila Social Worker Officer sa Barangay Vista Alegre nga si Christine Mae Treyes.
Pakig-angotan sang mga ini ang pamilya sang 11 anyos nga bata, kag sila ang magapatigayon man sang counselling.
Ang DSSD man ang magaprotekta sa kinamatarong sang menor de edad kag magaseguro nga masunod ang nagakaigo nga proseso kag ang layi sa pagkuha sang custody sa bata.
Pasalig ni Mangga nga seguruhon nila nga mapatigayon ang nagakaigo nga case management, kasubong man matumod kun ano ang natabo antes pa makuhaan sang suspected shabu ang bata.
