Nagpatigayon sang counter investigation ang Bacolod Police Station 7 sa Barangay Banago syudad sang Bacolod kun sa diin residente ang manugbaligya sang isda ang ginsalvage ukon ginwigit sa kakahuyan sa Purok Guanzon, Barangay Mansilingan, Bacolod City kag ini ang nasapwan sang mga pumuluyo sang Biyernes sang aga.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 7, nadiskubrehan nila sa ginpatigayon nga counter investigation nga antes paman ginwigit sa Barangay Mansilingan sang Biyernes, gin-abduct ini sa Barangay Banago santo sa amateur video nga naretrieve nila.
Suno kay Bonilla, wala man ini nareport ang ginapahayag nga abduction bangud wala man nakahibalo ang pamilya sang biktima.
Sa karun ang naretrieve nga amateur video sang pagabduct sa biktima nga si Henry Paul Bombate ang ginauyatan nga ebidensya sang mga kapulisan.
Suno sa station commander, magapatigayon sang imbestigasyon agud nga mahibaluan kun kilala sang pamilya sang biktima ang nagabduct diri.
Nagabulig man ang Bacolod Police Station 3 sa Police Station 7 sa imbestigasyon sa kamatayon sang biktima.
Ang biktima ang nakaagom sang pito ka gunshot wound nga ginalakipan sang apat sa ulo kag tatlo sa dughan.
Wala naman sang narecover nga slug ukon cartridges sang bala sa crime scene.
Ginpahayag man ni Bonilla nga sa natipon nila nga impormasyon may kaangtanan sa illegal nga druga ang kaso sang biktima matapos nga mapriso sang tuig 2019 matapos nga madakpan sa buybust operation nga ginpatigayon sadto sa Barangay 12 syudad sang Bacolod.
