Wala sa gihapon sang person of interest ang Bacolod Police Station 7 sa nagluthang-patay sa 20 anyos nga lalaki nga gina-alegar notorious nga akyat-bahay sa Purok Arao, Barangay Vista Alegre, Bacolod City sang Nobyembre 9, 2024.
Madumduman nga nasapwan na lamang nga wala sang kabuhi si Joshua Guardario, 20 anyos, single, wala sang trabaho, tumandok sang Barangay 16, Bacolod City kag ini ang may igo sang bala sa nagkalain-lain nga bahin sang lawas.
Sa interview sang Bombo Radyo Bacolod kay Police Lt. Regino Robles, deputy chief of police sang Bacolod Police Station 7, nagabisita lamang si Guardario sa iya nga ginikanan sa Barangay Vista Alegre kun diin ini ginluthang.
Suno diri, nakit-an sa tupad sang biktima ang duha ka sako kun sa diin ang isa ang naga-unod sang inugbulang nga manok kag ang isa ang may unod nga electric wires nga ginapatihan mga kinawatan sini.
Suno kay Robles, ginalantaw nga motibo sa pagpatay kay Guardario amo ang pagpangawat sini bangod nga madamo na sang reklamo nga theft kag robbery batok sa iya apang wala sang may nagpasaka sang kaso.
Sa karun nagahulat pa ang kapulisan sa luyag nga maghatag sang impormasyon angot sa natabo kag nagpasalig nga protektahan ang identity sang magaserbe nga witness.
