Affidavit nalang ang kulang sang Bacolod Police Station 8 agud nga makapasaka sang kaso sa suspetsado nga nagpatay sa barker nga si Adonis Matulac sa Lacson Extension, Barangay Singcang Airport sang Huwebes sang gab-i.
Sa interview sang Bombo Radyo sa station commander sang Bacolod Police Station 8 nga si Police Major Joery Puerto, naengganyo na nila ang isa ka witness nga nakakita sang pagpatay kay Matulac kag tinguhaan man nila nga maengganyo ang isa pa gid ka saksi nga makahatag man ini sang testimoniya.
Santo sa panaysayon sang mga witness, nakumpirmar sang Bacolod Police Station 8 nga ang nagpatay kay Matulac amo ang subject sang buybust operation sa Purok Hollow Blocks sang Huwebes sang udto apang ini ang nakapalagyo antes naconsummate ang operasyon.
Suno kay Puerto, si Matulac ang nagakuha sang drug supply sa suspetsado apang masami nga kulang ang bayad sini gani mahimo nga nagpati ini nga si Matulac ang nanugid sa mga otoridad gani napatigayon ang buybust.
