Wala sa gihapon sang person of interest ang kapulisan sa pagluthang patay sa isa ka contractor sa Purok Masagana, Barangay Sum-ag, Bacolod City sang Martes sang hapon.
Ang biktima ang ginkilala nga si Greg Alvin Gelito, 39 anyos, kag residente sang Barangay 35, ciudad sang Bacolod.
Si Gelito ang ginluthang sang ini ang magabalik na kuntani sa salakyan gikan sa Talabahan nga masami man sini nga ginakan-an.
Sa imbestigasyon, natumod nga may kaso nga estafa kag bayolasyon sa bouncing check law ang biktima sa Boracay sang Hulyo 2022.
Samtang ini ang ginpadal-an man sang demand letter bangod sa wala pa nabayaran nga utang nga nagadangat sa P800,000 gikan sa isa ka hardware trading sa ciudad sang Bacolod sang Enero.
Sa interview sang Bombo Radyo Bacolod kay Police Captain Michael Tuburan, Officer in Charge sang Bacolod City Police Station 9, padayon ang ila imbestigasyon sa kaso ni Gelito nga estafa kag ang demand letter sa financial obligation sini.
Suno diri, nagkoordinar naman sila sa pamilya sang biktima para sa dugang nga impormasyon.
Apang, mabudlay naman para sa ila nga makakuha sang witness bangod nga wala sang makahatag sang description sang mga suspetsado bangod man sa ginakabalaka nila ang ila nga safety.
