Ginpahayag sang station commander sang Bacolod Police Station 1 sa isa ka semana nga pagselebrar sang Masskara Festival 2023 nga madamo na ang mga tawo ang nagapadulong sa Bacolod Public Plaza.
Sa interview sang Bombo Radyo Bacolod kay Police Major Elmer Bonilla, indi lamang ang mga kapulisan ang nagabantay agud nga mapabilin ang kalinong kag katawhay sa pagselebrar sang Masskara Festival.
Suno kay Bonilla, kalakip sa nagabantay amo ang Bureau of Fire Protection; Medics kag katapo sang Yuhom Foundation.
Gilayon man ang mga kapulisan kag ang mga government agencies ang nagaresponde sa tion nga kinahanglanon.
Samtang, ang mga nagabaligya sang inasal ang gin-abisuhan nga pang-utdon ang punta sang stick bangud delikado ini.
Suno kay Bonilla, may mga instance man nga may yara sang gamay nga diskusyon nga nagluntad sa mga nagailinom kag gin-endorso nila sa Barangay agud nga mahusayan.
Nakasugtan man sang Bacolod Yuhum Foundation kag sang mga vendors kasubong man sang mga kapulisan nga ala 1:30 ang takna sa kaagahon ang last order na kag pagabot sang alas 2:00 sang kaagahon sirado na ang mga ini apang kun mag-ayo agud makabawi ginahatagan man sang konsiderasyon.
Tinutuyo ni Bacolod City Police Office Director Police Col Noel Alino nga zero accidents subong nga Masskara 2023 gani nagrequest ini sang augmentation nagikan sa Negros Occidental Police Provincial Office kag Police Regional Office 6.
Nagpanugyan man ini sa mga festival goer nga indi na magdala sang kontrabando agud malikawan nga mangatubang sang criminal charges.
