Liwat nga ginbuksan ang Bacolod Respiratory Out-Patient Center sa BAYS Center agud nga mabuhin-buhinan ang mga pasyente nga nagapila sa Corazon Locsin Montelibano Memorial Regional Hospital (CLMMRH).
Pila na ka adlaw nga tuman kalaba ang pila sa gwa sang CLMMRH.
Sa pagtsekyar sang Bombo news team, kadamuan sang mga pasyente ang nagsugod sa pagpila kahapon agud nga una man nga makakuha sang numero bangud first come, first served basis ang sistema sa balay-bululngan.
Sa interview sang Bombo Radyo kay Bacolod City Vice Mayor El Cid Familiaran, ginbuksan liwat subong nga adlaw ang respiratory out-patient center agud nga madecongest ang CLMMRH.
Aminado si Familiaran nga kalabanan nga mga pasyente nga nagapila sa regional hospital ang indi taga-Bacolod apang bukas para sa tanan ang out-patient center kung konsultasyon sa respiratory illness man lang ang ila kinahanglan.
Suno sa bise alkalde, makaluluoy ang mga pasyente nga nagapila sa CLMMRH bangud exposed sila sa health hazards gani nagdesisyon si Mayor Evelio Leonardia nga buksan ini liwat.
Ang out-patient center ang ginsiraduhan sa una nga semana sang bulan sang Hunyo bangud natapos na ang kasugtanan sa tunga sang city government kag mga volunteer doctors kadungan sang pagtakop sang general community quarantine kun sa diin nagbalik na sila sa ila clinic.
Suno sa bise alkalde, mga doktor nagikan sa City Health Office ang nagaserbe sa karon sa out-patient center.
Maga-hire man ang city government sang bag-o nga mga doktor agud nga magduty sa respiratory out-patient center.
Sa bahin naman sang Negros Occidental, ginpahayag ni Governor Eugenio Jose Lacson nga istoryahon niya ang pinuno sang hospital operations department kun ano ang mabulig sang mga district hospitals agud indi na magpadulong sa Bacolod ang mga pasyente nga magapakonsulta man lang.
