Nangin mainit ang pagdiskusyon sa session hall sang Bacolod City Government angot sa resolusyon nga nagahingyo sa lima ka mga opisina sa City Government of Bacolod sang status report sang High Data Infrastructure Corporation sa pagtukod sang Centralized Command Center sa Bacolod City.
Ang lima ka departamento nga ginapangayuan sang status report sang mga proyekto sang nasambit nga kumpaniya sa ciudad amo ang City Engineer’s Office nga ginapamunuan ni Engr. Loben Rafael D. Ceballos; City Assessor nga ginapamunuan ni Atty. Maphilindo Polvora; City Treasurer nga ginapamunuan ni Jose Maria Gecosala; City Accountant Atty. Jeremae Ann Ceriaco kag Management Information Technology and Computer Services (MITCS) Officer in Charge Edrian Roel Robete.
Nagdangat sa isa ka oras ang nangin deliberasyon antes nga na-aprubahan sang Sangguniang Panlungsod ang resolusyon.
Antes pa man ang pag-apruba sa ginaduso nga resolusyon, nagbayluhanay sang tinaga sanday Councilor Al Victor Espino kag Councilor Wilson Gamboa natuhoy sa resolusyon nga gin-file ni Gamboa.
Nag-ugat ang pagbayluhanay sang tinaga sang duha ka konsehal sang namitlang ni Gamboa ang tinaga nga loan.
Gin-athag sang pila ka mga konsehal nga indi loan ang P2.1 billion nga Public-Private Partnership (PPP) agreement kaupod ang High Data Infrastructure Corporation para sa napulo katuig nga Build Transfer Maintain.
Ginpangayuan man ni Espino si Gamboa sang vouchers nga may nadiburse na nga pondo.
Kasunod sini ginpakakas ni Gamboa ang iya nga statement.
Bangud sini nag-alma si Espino kag nagpahayag nga dapat mangin responsable ang konsehal sa mga ginabuy-an nga tinaga bangud indi ini manami para sa Sangguniang Panlungsod ilabi na nga ginacover sang media ang nagakatabo sa session.
Kalakip sa mga nagpaathag nga indi loan ang P2.1 billion nga proyekto amo sanday Councilors Al Victor Espino, Atty. Caesar Distrito, Celia Flor, Em Ang, Atty. Dindo Ramos, kag Jude Thaddeus Sayson.
Ginpaathag ni Councilor Espino nga magabayad lamang ang lokal nga panguluhan base sa mga proyekto nga matuman sang High Data Infra Inc.
Madumduman sa idalom sang administrasyon ni anay Mayor kag karon Bacolod City Lone District Representative Alfredo “Albee” Benitez, ginduso ang PPP project agud mapatuman ang e-governance kag digitalization, pag-establisar sang command center, kag pagbutang sang Intelligent Street Lamp Poles nga may dynamic cameras para sa traffic kag flood monitoring, kag iban pa nga proyekto.
