Nagdaog ang Volleyball Secondary Girls sang Bacolod Tay Tung High School nga delegado sang Western Visayas sa Palarong Pambansa 2025 sa hampang batok sa Region 1 ukon ang host nga Ilocos Region.
Gin-athag sang public information officer sang Department of Education Western Visayas nga wala pa sang medalya sa una nga adlaw sang mga pahampang sa Palarong Pambansa 2025.
Sa interview sang Bombo Radyo Bacolod kay Hernani Escullar Jr. 20 ka events ang ginpasakupan sang mga atleta gikan sa Western Visayas kahapon.
Apang ang mga ini ang elimination games, gani wala pa sang medalya.
Alas-6:00 kaina sang aga ginsuguran na ang mga hampang kag nakuha ni Chrisia Mae Tajarros sang Leyte ang una nga bulawan nga medalya para sa Region 8 ukon Eastern Visayas Region.
Suno kay Escullar, subong nga adlaw kuntani ang first day sang hinampang, apang sa ila nga solidarity meeting, nakasugtan nga ini ang patimpranuhon.
Paathag sini nga sa masami sa 3rd tubtob 5th day pa antes makahatag sang medalya sa mga team sports.
Ini ang medyo malawig bangod 17 ka rehiyon ang magkasumpong, samtang sa athletics, mahibaluan naman gilayon ang resulta.
Ginapakamaayo na lamang ni Escullar nga Mayo 16 pa lamang nagpadulong na sila sa area gani naka-adjust na sa tuman ka init nga temperatura.
Ang outdoor events ang ginapatigayon masami alas-7:00 sang aga tubtob alas-10:00 sang aga kag ang event ang nagaresume sa hapon.
Samtang may hampang naman bisan sa udto sa indoor events bangod sila ang yara man sa environment nga kontrolado ang init.
Sa halos isa ka libo nga atleta, kapin 200 ang stay out ukon nagatinir sa gwa sang billeting school.
Ginpasalamatan man sini ang San Nicholas National High School nga naga-atindir sa ila kinahanglanon kaangay sa problema sa nagakadula nga tubig kun kaagahon, kun sa diin nagtukod ang mga ini sang dugang nga deepwell.
Ang hampang ang nakaschedule nga matapos Mayo 30 samtang sa Mayo 31 naman ang closing program.
Suno kay Escullar, handom nila nga makuha ang kampyonato kag mangin memorable ang ulihi nga pag-upod sang Negros Occidental sa Western Visayas delegation.
