Ginalauman na sang Bacolod Traffic Authority Office (BTAO) nga dako ang ila nga mangin adjustment karun nga 30 ka mga panibag-o nga modernized jeepney ang nag-abot kag natalana na nga mag-operate sa syudad sang Bacolod.
Suno kay P/Maj Junjie Liba, pinuno sa BTAO, 97 ang kabug-usan nga modernized jeepney unit nga ginapaabot gani may 67 pa nga adisyunal nga unit nga ginalauman nga maga-abot sa bulan sang Pebrero.
Bangod sini ginalauman na sang mga ini nga magagutok ang dalanon bangod magadamo ang units sang modernized jeepney, samtang padayun man ang operasyon sang traditional jeepneys.
Bangod dalagko ang units sang modernized jeepney, plano ni Liba nga magpropose sang pagplastar sang designated nga loading kag unloading station kun sa diin lang ang mga ini sarang makakuha sang pasahero.
Paathag sini nga sa karun, nagagutok ang dalanon bangod isa lamang ang ruta sang modernized kag traditional jeepneys samtang may iban naman nga gamay lamang ang pagbag-o sa ruta.
Bangod sa pagdulog sang isa lamang ka mga lugar sang modernized kag traditional jeepneys, indi man malikawa nga may magluntad nga tensyon bangod sa pag-agaway sang pasahero.
Dugang pa sini nga makabig nga pribelihiyo sang traditional jeepney drivers nga sila ang nahatagan gihapon sang tyansa nga makabyahe samtang indi pa fully implemented ang modernized jeepney, gani panugyan ni Liba nga mag-intindihanay lamang kag likawan ang pagba-isay bangod parehas lamang ang mga ini nga nagapangabuhi.
Pahanumdom ni Liba nga agud malikawan ang away, pabay-an na lamang ang mga pasahero nga magpili sa kun diin nila luyag magsakay.
