Magadeploy sang 75 ka mga traffic enforcers ang Bacolod Traffic Authority Office agud magseguro sa dalagan sang trapiko sa natalana nga temporary full road closures sa Dalan Lacson kadungan sa Nationwide Rally for Peace sang Iglesia ni Cristo sa Lunes, Enero 13.
Sa interview sang Bombo Radyo Bacolod kay BTAO Deputy Head Jose Antonio “Jojo” Robello, ang aktibidad ang patigayunon halin alas-6:00 sang aga tubtob alas-12:00 sang tungang gab-i.
Magapatuman sang full road closures halin sa Cottage Road tubtob sa 15th Street kasubong man sa porsyon sang 6th Street.
May divertion naman sa labayan sang mga public utility vehicles kag mga private vehicles nga kaangay sa ginpatuman sang ginsarado ang Lacson Tourism Strip sa tion sang Masskara.
Suno kay Robello, ginabanta 10,000 tubtob 20,000 ang magapartisipar nga INC members gikan sa bilog nga Negros Island.
Magahamtang naman sang stage sa sulod sang Negros Occidental Capitol Lagoon para sa main program apang bangod sa kadamuon sang magatambong, ginalauman na nga maga-awas sa area ang mga INC members, gani nadesisyonan nga isarado na lamang ang mga dalan.
Aminado si Robello nga may mga ginpatigayon man nga rally sa lagoon tinalikdan nga tuig, apang ini ang magagmay lamang indi kaangay sa karun nga simultaneous nga patigayunon sa nagkalainlain nga bahin sang Pilipinas.
Ang BTAO ang magasapol man upod sa Bacolod City Police Office agud mafinalize ang security, safety kag traffic plans.
Bangod Lunes kag may klase kag opisina, ginalauman na sang BTAO ang mabug-at nga lakat sang trapiko.
Panugyan ni Robello sa mga magabyahe nga temprano pa maglakat agud indi maipit sa traffic.
