Magapaidalom sa pre-evaluation sang korte ang ginpasaka nga kaso sang pila ka operator sang modernized jeepney batok kay Bacolod Traffic Authority Office Head.
Sa interview sang Bombo Radyo Bacolod kay Atty. Ray Gorgonio, Legal Counsel ni Philip Burata kag iban nga operator, napasaka na nila ang kaso nga carnapping kag grave coercion kahapon kag ginalantaw nga madugangan pa ini.
Ini kasunod sang walo ka mga modernized jeep ang ginparahan kag gintow sadtong Hulyo 7, 2024 bangud nagaoperate ini nga expired ang prangkisa ukon colorum.
Apang bangud nakapakita man sang nagakaigo nga papelis ang owner nga siya ang nagapanag-iya sa mga unit, ini ang ila man nga ginrelease matapos mabayaran ang violation.
Suno kay Gorgonio, indi ang Choret Corporation ang nagapanag-iya sang mga units bangud ang kliyente sini ang nagabayad sang amortization kag may yara ang mga ini sang ginauyatan nga resibo bilang pamatuod.
