Gilayon man nga nagsabat ang pinuno sang Bacolod Traffic Authority Office angot sa mga alegasyon ni City Councilor Al Victor Espino tuhoy sa implementasyon sang clamping kag towing sa Dalan Lacson.
Suno kay Police Major Junji Liba, may pirmahanay sang memorandum of agreement sa tunga sang city government kag sang third party nga nagatowing.
Suno kay Liba, full implementation na ang ginapatigayon sa karon bangud may duha ka semana nga information dissemination antes ang Oktubre 9.
Ini ang ginapatuman base sa City Ordinance 818 as amended by City Ordinance 1035.
Suno kay Liba, ang BTAO ang nagapatuman sang ordinansa bangud sila ang ginmanduan sang ordinansa nga mag-implementar sini.
Aminado ini nga may epekto ang clamping kag towing bangud naghawan ang Dalan Lacson.
Sa una nga adlaw sang implementasyon kahapon, Oktubre 9, 14 ang gin-tow kag gin-impound samtang 44 naman ang ginclamp sang BTAO.
Ang mga gintow nga salakyan ang ginhingagaw man gawad sang ila nga mga tag-iya.
Sila ang gin-impound sa daan nga planta sang bottling company sa tung-anan sang 15th kag 16th Street.
Kalabanan nga gin-impound ang yara sa tadlong sang Corazon Locsin Montelibano Memorial Regional Hospital.
Kadungan sang ikaduha nga adlaw sang implementasyon sang ordinansa, indi na madamo ang nagpark sa Dalan Lacson ilabi na nga maulanon ang panahon, apang nagresume man ang towing sang nag-untat ang ulan.
Ginpasiguro naman sini nga indi mangin ningas-kugon ang implementasyon sang ordinansa, sa baylo, ilakip naman ang iban nga dalanon diri sa ciudad.
