Aminado ang pinuno sa Bacolod Traffic Authority Office (BTAO) nga kinahanglan sang dugang pa nga information dissemination sa traffic regulations sa ciudad.
Natalupangdan ang asod-asod na lamang nga mga aksidente sa dalanon nga masami tuga sang mga drivers nga wala nagasunod sa traffic regulations.
Kalakip na diri ang mga nagamaneho nga hubog, wala nagasignal antes magliko, derederetso nga pagpadalagan apisar nga nakastop ang traffic light, wala nagabahar sa pedestrian lanes kag iban pa.
Sa interview sang Bombo Radyo Bacolod kay BTAO Head Patrick Leonard Lacson, nakigsapol na ini sa newly elected Bacolod City Sangguniang Kabataan (SK) Federation President Danna Marie Cuaycong Barzo kun sa diin iya nga gin-ayo sa SK nga magbulig sa information campaign sa traffic safety kaangay na lamang sa mga eskwelahan.
Isa sa halimbawa ni Lacson amo ang mga e-bike nga makita nga nagabyahe apisar sa mga national highways.
Paathag sang BTAO Head nga nahangpan niya nga nagapangabuhi lamang ang mga ini, apang dapat man nga mahangpan nga sila ang wala sang rehistro sa pagbyahe sa mga major roads.
Dugang pa ni Lacson, nga wala sang manabat kun may malain nga matabo sa mga pasahero sang ebike.
Gani importante suno diri ang information campaign agud nga sa tion nga magpanakop ang mga BTAO personnel sang mga nagalapas, nakahibalo na ang mga ebike driver sang ila bayolasyon kag indi na magpinsar nga sala ang pagdakop sa ila.
Apang apisar sina, nagalaom man si Lacson nga mapangitaan sang Sangguniang Panlungsod sang alternatibo nga palangabuhian ang mga apektado.
