Magapasa na sang report ang pinuno sang Bacolod Traffic Authority Office (BTAO) sa Office of the City Mayor tuhoy sa assessment sang One Way Traffic Scheme sa Lunes.
Sa interview sang Bombo Radyo kay Police Major Junji Liba, bwas nga adlaw, Marso 12 ang ika-90 nga adlaw sang implementasyon sang one way traffic scheme gani nagpreparar ini sang gamay nga report kag observation tuhoy diri.
Suno sa iya, may mga ginalakip man ini nga mga rekomendasyon kag iya ini igapasa kay Mayor Alfredo Benitez para sa iya impormasyon kag agud makahatag man ini sang iya kaugalingon nga mga rekomendasyon.
Amiando si Liba nga sang Enero, kun san-o una nga gin-implementar ang nasambit nga systema, may yara sang kabudlayan bangud naga-adopt pa ang mga tawo.
Ini man ang iya ginalantaw nga rason kun ngaa madamo sang nadakpan nga violators.
Suno diri, pagkatapos sang duha ka bulan, wala naman sang problema kag nakit-an na ang mabulig sang nasambit nag scheme.
Indi naman malipod suno sa iya nga may mga nagakwestiyon kag nagapadala sang mga reklamo apang ila man ini ginabaton.
Suno sa pinuno sang BTAO, mas pabor kuntani kun mangin ordinansa ini kag siya ang nagalaom nga mamodify ang mga kinahanglan nga mamodify.
