Ginahulat pa sang Bacolod Traffic Authority Office (BTAO) ang derektiba gikan kay Bacolod City Mayor Alfredo “Albee” Benitez may kaangtanan sa pagpanakop sang e-bike kag e-trike.
Sa interview sang Bombo Radyo Bacolod kay BTAO Head Patrick Leonard Lacson, nagalaom ini nga mafinalize na sang mga National Agencies kaangay sa Land Transportation Franchising and Regulatory Board (LTFRB) kag Land Transportation Office (LTO) ang pagregulate sang mga e-bike kag e-trike.
Panindugan ni Lacson nga tuman na ka makaalarma bangod ang mga e-trike kag e-bike ang halos ginakilala na nga kabahin sa public transportation.
Apang ang mga nagabyahe ang wala sang rehistro kag wala man sang accident insurance, gani delikado indi lamang para sa mga drivers kasubong man sa mga pasahero.
Suno diri, bilang kaangay nga kalakip na sa public transportation sector ang e-bike kag e-trike, dapat nga hatagan man sang LTFRB sang routa ang mga ini agud indi makaapekto sa iban nga public transportation.
Pahanumdom sini nga mahinay ang speed sang mga ebike kag etrike gani ini ang makatuga sang trapiko kun pahanugutan nga makabyahe sa mga national road.
Suno kay Lacson, nagdesisyon si Benitez nga hatagan sang isa ka bulan ang mga e-bike kag e-trike antes mapanaugan sang local nga ordinansa para sa pagregulate sa ila.
Sa karun, nagahulat na lamang sang derektiba ang BTAO sa kun ano ang masunod nga tikang, bangod sila ang implementing body lamang.
