Nagalaom ang Bacolod Traffic Authority Office nga mapadayon ang sakop sa karon sang experimental traffic scheme kun matapos na ang 90 ka adlaw nga implementasyon.
Suno kay BTAO head Police Major Junji Liba, ang 90-day experimental traffic scheme nga ginalakipan sang truck ban kag one way sa pila ka dalan ang magaduha na ka bulan sa Pebrero 12 bangud nagsugod ini sang Disyembre 12.
Kun ini ang matapos, magapreparar si Liba sang rekomendasyon sa alkalde sang ciudad ukon himuan nalang ini sang ordinansa.
Sa personal nga assessment ni Liba, nakita sini nga bentaha ang traffic plan kun ini ang pagasundon bangud mas manami ang flow sang trapiko kag wala sang sagabal.
Apang kun wala ang traffic enforcer suno sa iya, may yara gihapon sang violators.
Suno kay Liba, kinahanglanon ang patin-adon ang enforcement sang traffic regulations.
Aminado man ini nga may mga oras nga nagagutok ang dalagan sang trapiko ilabi na kun may klase kaangay sang yara sa CL Montelibano Avenue bangud may mga salakyan ang kalabanan nga mga estudyante gani heavy ang traffic diri kun magdungan ang mga salakyan, ilabi na kun Lunes sang aga kag Biyernes sang hapon.
Suno sa BTAO head, dako ang kinalain sa karon nga may experimental traffic scheme sangsa sadto nga wala bangud dako ang volume sang traffic, indi kaangay sang bulan sang Disyembre nga naregulate ang paglabay sang mga truck.
Nahibaluan nga sa karon, ginapatuman ang 5-minute interval sa mga truck sa Circumferential Road gani wala nagadungan ang volume sini sa dalan kundi nagakatad-katad.
Sugod sang Disyembre 12, ginabanta nga 300 na ang nadakpan nga violators sang truck ban kag one-way scheme sa Dalan Lacson kag pag-ignore sang traffic signs.
