Nagapanawagan ang Bacolod Traffic Authority Office sa Sangguniang Panlungsod nga pasakaan ang penalty sa mga traffic violators.
Sa interview sang Bombo Radyo Bacolod kay BTAO deputy head Jose Antonio “Jojo” Robello, madamo na sang mga navideohan nga mga wala nagasunod sa traffic rules.
Suno diri, ini bangod sila ang wala nagakahadlok kag wala nagakadudla sa P300 nga penalty kun ma-issuehan sang citation ticket.
Madumduman nga sang nakaligad, una nga naggwa ang video sang modernized jeepney sa dalan Gatuslao nga nakuha sa dashcam sang isa ka salakyan matapos nga ini ang nagderetso lamang apisar nga nakapondo na ang iban nga salakyan bangod nagpula na ang traffic light.
May ara naman nga una nga nakatabok sa pihak nga lane, apang sang magligwa, didto na kag naglusot ang driver nga nagrason lamang nga siya ang naalang-alang.
Apang kasunod sini, may isa naman ka traditional jeepney nga nakuhaan man sang dashcam nga naglapas sa red lights sa Burgos-Gallo Street.
Suno kay Robello, ang jeep ang may routa nga Libertad – Mandalagan gani iya ini gilayon gintrace sa ila nga paradahan sa Ceres North Terminal.
Gin-abiso sini sa operator nga pakadtuon sa BTAO office ang driver agud ma-issuehan sang citation ticket, apang ini ang wala nakapalapit sang Biyernes.
Rasun sang operator nga wala sang cellphone ang driver, kag sila ang nagpalapit sang Lunes.
Kaangay sa una nga violator, ang driver ang ginhatagan man sang citation tickets sa violation nga “beating the red light” kag “reckless driving.”
Apang aminado si Robello nga ang P300 nga penalty ang indi makapadudla sa mga salawayon nga driver.
Magluwas sa multa, ang mga driver ang liwat nga ginpaidalom sa seminar.
Paathag ni Robello, nga ang penalidad sa violation ang nakabase sa ordinansa nga ginpanaog sang Sangguniang Panlungsod.
