Gin-athag sang pinuno sang Bacolod Traffic Authority Office nga isa ka subsidiary liability sang driver sang mga pampubliko nga salakyan ang liability sang mga pasaway nga pasahero.
Nahibaluan nga ginreklamo sang Bacolod Drivers Association (BACODA) sa Barangay Handumanan ang pagmulta sa mga driver sang public utility jeepney sa tion nga may pasahero nga wala nagasuksok sang face shield.
Sa interview sang Bombo Radyo Bacolod kay BTAO head Lt. Col. Luisito Acebuche, dapat nga pahanumduman gid sang mga driver ang mga pasahero sini nga indi pagkakason ang face shield samtang nagabiyahe agud nga indi madakpan.
Suno kay Acebuche, hugot nila nga ginapatuman ang amo nga pagsulundan bangud protocol ini sa bilog nga pungsod.
Ginpanindugan ni Acebuche nga ang driver mismo ang responsable diri.
Apang, dapat man nga magkooperar kag mangin responsable man sa ila kaugalingon ang mga pasahero.
Nahibaluan nga P200 ang multa para sa mga taga-Bacolod; P300 sa mga taga indi Bacolod kag 8 hours community service sa mga wala sang kwarta kun ang BTAO ang makadakop samtang nagadangat naman sa P2,000 kun Land Transportation Office ang makadakop.
Ginpasalig naman ni Acebuche nga bukas ang iya talatapan para sa transport sector agud hambalan ang ini nga butang.
