Ginpasalig sang Bacolod Traffic Authority Office (BTAO) nga wala nila ginatolerar ang hana nga pagpanumbag sang isa ka traffic enforcer sa barker sang jeep sa BS Aquino Driver sa Brgy 5, Bacolod City sang Pebrero 3 sang hapon.
Ini matapos nga naglapta sa social media ang komosyon sa dalan matapos makuhaan sang video ang hana nga pagpanapungol.
Sa interview sang Bombo Radyo Bacolod kay BTAO deputy head Jose Antonio “Jojo” Robello, sa inisyal nga impormasyon, ginsaway sang traffic enforcer ang barker, apang ini ang nagbunot sang kutsilyo nga ginabanta 7 ka pulgada.
Tubtob nga ginhanaan sang inumol sang traffic enforcer ang barker nga amo ang nakuhaan sang video.
Paathag ni Robello nga may Anti-Barker Law ang Bacolod City nga nagadumili sa mga barker.
Aminado ini nga kun kis-a mapalampuwas lamang ang pagpasaka kag pagpanaog sang pasahero, apang may mga barker nga nagareserba sang dalan agud parkingan sang salakyan.
Sa pihak sini, ginpanindugan ni Robello nga wala nila ginatolerar ang pagpanapungol magluwas lamang kun self defense, apang kun mahimo likawan na lamang ang gamo.
Suno diri, iya pa nga estoryahon ang enforcer kag ini ang ila naman nga gintransfer sa lain nga area para sa iya safety.
Ini bangod nakabatun sila sang impormasyon nga ang barker ang may-ara sang grupo.// Napahibalo naman sini kay Bacolod City Mayor Alfredo “Albee” Benitez natuhoy sa isyu.
