Ginklaro sang pinuno sang Bacolod Traffic Authority Office nga isa ka colorum ang tricycle driver nga si alyas Neneng nga nagreklamo nga gini-ticketan kag ginkuhaan sang lisensya sa depensa sini nga siya kuntani ang magabakal lamang sang bulong.
Sa interview sang Bombo Radyo kay Police Major Junji Liba, nag-ako mismo si Neneng nga colorum ang tricycle nga iya ginamaneho.
Suno kay Liba, nadakpan si Neneng sang Huwebes, kag nagpadulong sa BTAO apang wala ini naakomodar ni Liba bangod may yara ini sang training program nga ginpartisiparan.
Luyag kuntani ni Liba nga isturyahan sa lamesa sini ang kun sin-o man nga nagapadulong para magreklamo kasubong man nga nagaplano ini nga mahimuan sang report ang bahin sang iya personnel.
Pahayag ni Liba, si Neneng mismo ang nag-ako nga colorum ang iya ginabyahe kag dugang pa nga nakaparada ini kaupod ang mga tricycle nga colorum sang nag-abot ang operating team kag gilayon nga nagpalagyo apang nalakip si Neneng sa mga nadakpan.
Kag santo sa pahayag ni Neneng, nga wala sini ginagamit ang tricycle para magbyahe kundi para lamang nga service kag pagbakal sang bulong, ini na ang gindudahan ni Liba nga indi mahimo nga nag-tricycle ini para lang nga iservice.
Kasubong man, makapila na ini makabati sang amo nga rason.
Mensahe ni Liba sa tanan nga nagabyahe nga kun wala sang legal nga papeles nga ginakapyotan, mas maayo kun mangita na lang sang alternatibo nga trabaho bangod nga desidido ini nga magdakop sang colorum.
