Nagbutang na ang Bacolod Traffic Authority Office (BTAO) sang mga signages sa mga dalanon sa syudad sang Bacolod kag nagpatigayon na sang final briefing sa mga BTAO personnel kag mga Barangay Tanods nga magaaugment sa pagpatuman sang bag-o nga traffic plan.
Sa interview sang Bombo Radyo Bacolod kay Police Major Junji Liba, nagligad pa nila nga semana ginplano ang nasambit nga traffic plan kag matapos ang konsultasyon nakadihon na sila kaupod ang Bacolod Traffic Authority Council sang plano nga mabuhin-buhin sang kabug-at sang trapiko sa syudad sang Bacolod.
Suno kay Liba, magapatuman ang syudad sang one-way scheme sa dalan Lacson, Aguinaldo kag Gatuslao.
Ang Aguinaldo street ang one way lang ang maagyan sa south padulong sa north direction kag ginapahanugutan ang diagonal parking sa east side sang dalan.
Ang Gatuslao street ang one-way man padulong sa north to south kag ginapahanugutan ang diagonal parking sa west side sang dalan.
Ang mga salakyan padulong sa east to west, nagikan sa Lacson padulong sa Aguinaldo streets, ang mahimo lang makalabay sa 12; 14; 16; 18; 22; 23; kag 25th streets kag ginapahanugutan ang diagonal parking sa north side sang nasambit nga mga dalan.
Ang mga magikan naman sa Aguinaldo padulong sa Lacson ang mahimo makaagi sa 13; 15; 17; 19; 21 kag 24th streets.
Samtang sa truck-ban naman, may total truck ban humalin alas-4:00 sa kaagahon tubtob alas-8:00 sa aga samtang ipatuman ang regulated trucks entry kun sa diin may tag-5 minutes nga interval humalin alas-8:00 sa aga tubtob alas-4:00 sa hapon kag liwat ipatuman ang total truck ban humalin alas-4:00 sa hapon tubtob alas-9:00 sa gab-i.
Hilway naman nga makasulod ang mga truck humalin alas-9:00 sa gab-i tubtob alas-4:00 sa kaagahon.
