Gin-athag sang deputy head sang Bacolod Traffic Authority Office nga sila ang may kinamatarong nga mandakop sang mga out of route nga jeep.
Sa interview sang Bombo Radyo Bacolod kay BTAO deputy head Jose Antonio “Jojo” Robello, may routa ang mga traditional jeepneys kag kun sila ang maglapaw, ini ang makabig na nga bayolasyon kag sila ang mahimo dakpon.
Ini matapos madamo sang mga traditional jeepneys nga nag-upod sa rally protesta sa Bata Flyover kaina sang aga nga gikan sa iban nga routa.
Madumduman nga nag-ibwal ang mga nagprotesta bangod matapos gin-abisuhan sang kapulisan nga magsaylo sa Bacolod Public Plaza, sila ang ginpaandaman man sang BTAO nga mahimo dakpon ang iban sa ila miyembro sa ila pagbyahe.
Paathag ni Robello nga ang out of route nga jeep ang pangitaan sang OR/CR kag driver’s license.
Kun wala sang maipakita, ang mga salakyan ang sarang nga ma-tow.
Magluwas sa towing fee, paathag ni Robello nga indi marelease ang mga jeepney units tubtob wala sang mapakita nga OR/CR.
Bangod sa nakita nga mga out of route nga jeep, sila ang may kaupod man nga Highway Patrol Group sa pagbantay sa dalan.
Paathag sini nga sila ang ginmanduan sang gobyerno sa pagpatuman sang layi.
Suno diri, kun indi magpati sa ila, dapat balikan ang ordinansa ukon ang legal basis sang ila pagpatuman.
Mensahe naman sini sa transport sector nga tanan nga problema ang madala sa estorya kag indi dapat intrahan sang emosyon ang pagpatigayon sang demonstrasyon, bangod ini masami rasun sang kinagamo.
