Preparado na ang Bacolod Traffic Authority Office sa mga dalan nga labayan sang prosesyon kadungan sang Biyernes Santo, Abril 15.
Suno kay Dennis Perma, pinuno ang administrative section sang BTAO, may traffic enforcers nga nakadeploy na sa indi magnubo 12 ka mga simbahan sa ciudad bangud kinaandan na ang pagdagsa sang mga tumuluo para sa duaw kag Visita Iglesia.
Suno kay Perma, ginhatagan sang prayoridad ang dalagko nga simbahan kaangay sang San Sebastian Cathedral, Carmelite, Redemptorist Church, kag Lupit Church.
Bangud nagpagwa sang advisory nga may yara sang procession sa Biyernes Santo, nakahanda naman ang deployment diri ilabi na nga magadungan ang iya sang Katoliko kag Aglipay.
Ang ruta sang Aglipay ang magasugod sa Dalan Burgos, manaog sa Rosario, padulong sa Araneta kag pabalik sa Burgos.
Ang ruta naman sang prosesyon sang Katoliko ang magasugod sa Dalan Rizal padulong sa Lacson-Libertad-Araneta kag pabalik sa Cathedral.
Suno kay Perma, handa na ang deployment plan para diri kun sa diin siraduhon temporaryo ang dalan Araneta kun maggwa na ang ulo sang prosesyon sa Awing.
Bangud sini, ginaabisuhan ang mga motorista nga maglabay sa Dalan Lizares.
Ginalauman naman ang pagdamo sang mga tawo sa Barangay Punta Taytay sa Easter Sunday bangud madamo ang magapaamulya sa mga beach.
Suno kay Perma, magapatuman sang one-way entry halin sa sadto Allied pasulod sa Barangay Punta Taytay kag sila ang magagwa sa Crossing Punta Taytay.
Ang entry naman ang tubtub lang sa Paraiso Resort samtang siraduhon naman ang halin sa Crossing Punta Taytay pasulod sa proper sang barangay bangud gamay ang dalan.
