Gin-athag sang alkalde sang ciudad sang Bacolod nga sarang makapatuman sang Clamping and Towing Ordinance ang Bacolod Traffic Authority Office sa Dalan Lacson bisan wala pa napirmahan ang memorandum of agreement sa tunga sang city government kag sang third party company nga Metro Towing Services.
Ini ang kasunod sang pagkwestyon ni Bacolod City Councilor Al Victor Espino sa pagsugod na sang BTAO sang clamping kag towing bisan wala na naaprubahan sang Sangguniang Panlungsod ang MOA.
Suno kay Mayor Alfredo Benitez, naghatag sang legal opinion ang City Legal Office angot sa memorandum of agreement gani ginarectify sa karon ang provisions sang MOA agud nga magconform sa legal opinion.
Apang samtang wala pa ang MOA suno sa alkalde, ang BTAO ang authorized nga magpatigayon sang towing kag clamping, santo sa existing ordinance kag sarang man ini makakuha sang serbisyo sang private company agud nga mag-assist sa towing and clamping.
Ginpasalig naman sang alkalde nga pirmahan niya gilayon ang MOA kun marectify na ang mga provisions.
Nakita man sang local chief executive nga nagtawhay na ang Dalan Lacson gani iya ini gindayaw kag ginpasiguro nga ini ang padayunon.
Nagpanawagan naman ini sa mga motorista nga mangin disiplinado kag sa mga traffic enforcers nga maghatag sang awareness sa mga motorista.
