Ginpahanumdom sang Bacolod Traffic Enforcement Unit nga magpabilin nga kalmado kun may yara man sang matabo nga indi pag-intindihanay sa dalan.
Madumduman nga may natabo nga road rage sa Antipolo City nga nagresulta sa shooting incident kahapon.
May nagluntad nga kinagamo sa tunga sang mga motorcycle riders kag 28 anyos nga driver sang salakyan.
Nagtinapongolay ang mga involved tubtob nga nagkuha sang armas-luthang ang driver sang salakyan kag nagpalupok.
Tatlo ang pilason sa insidente kalakip na ang live in partner sang driver sang salakyan nga nasalabat.
Sa interview sang Bombo Radyo Bacolod kay Bacolod Traffic Enforcement Unit Head Police Lt Col. Ramil Sarona, iya ginpahanumdom sa mga motorista nga indi magpadala-dala sa init sang ulo kag kun may matabo man nga misunderstanding sa tunga sang dalan, mas maayo nga ireport na lang ini sa pulis agud malikawan ang pag-ilinaway.
Dugang pa sini, likawan na lang ang pagbinaisay nga kun kaisa nagaresulta sa pag-ilinaway kag mahimo pa magresulta sa pagpangluthang.
Pahayag ni Sarona, sa ciudad sang Bacolod, kun may misunderstanding sa traffic nagakaresolve man gilayon bangod madasig ang pagresponde sang kapulisan.
