Kasunod sang nagluntad nga drug buybust operation sang Philippine Drug Enforcement Agency (PDEA) sa Bacolod Vendors Plaza kahapon, ginpahayag sang city administrator nga may nakaplano na nga rehabilitasyon sa merkado.
Suno kay Em Legaspi-Ang, kabahin na sa programa sang administrasyon ni Bacolod City Mayor Evelio “Bing” Leonardia ang rehabilitasyon sang mga dalagko nga merkado sa ciudad kalakip na ang Bacolod Vendors Plaza.
Apang bangod sa pandemic, isa naman ka tuig nga nadelay ang kadamuan sa mga proyekto sa ciudad ilabi na nga dako nga bahin sang budget sang ciudad ang gingamit sa paghatag sang ayuda kag mga galastuhan sa COVID-19 related operations.
Apang pasalig sang city administrator nga yara gihapon ang plano kag nagapati ini nga sarang na nga liwat masuguran ang rehabilitasyon.
Magluwas sa Bacolod Vendors Plaza, may dako man nga plano sang rehabilitasyon para sa tatlo ka dalagko nga merkado sa Bacolod nga ginalakipan sang Bacolod Central Market, Libertad Public Market kag Burgos Public Market.
Pahayag ni Ang nga bangod sa dako nga unemployment rate sa ciudad sang Bacolod kag yara lang sa panimalay ang mga tawo, nagatuga naman ini sang pagsaka sang naga-angkon sang problema sa mental health.
Dugang pa nga nagpalala sa ginabatyag sang mga pumuluyo amo ang pandemic kag mga ginpatigayon nga quarantine.
Panugyan naman ni Ang nga dapat mapabilin nga mabaskog kag halungan ang lawas kasubong man ang espiritwal kag mental nga aspeto agud nga indi magpadulong sa pagsulod sa makaguba nga bisyo kaangay nalang sa pagbuhat nga drug den sang mga tapangko.
Suno sa city administrator, ang ginpatigayon nga drug buybust operation sang PDEA ang nagapakita naman sang wala untat nga operasyon sang mga kapulisan batok sa iligal nga droga.
