Ginpagwa na sang Bacolod Yuhum Foundation ang official traffic route plan kag rerouting sa Bacolod Masskara Festival 2024.
Sa interview sang Bombo Radyo Bacolod kay Jose Antonio “Jojo” Robello, deputy head sang Bacolod Traffic Authority Office, alas-4:00 tubtob alas-5:00 subong nga hapon, sila kaupod sa kapulisan ang magapatigayon sang simulation.
Bwas magapatigayon sang Grand Salubong Motorcade halin sa Barangay Alijis, magalibot sa nanarisari nga dalan tubtob makadangat sa Bacolod City Government Center kag ini ang magasugod alas-4:00 sa hapon.
Ginpagwa naman sang Bacolod Yuhum Foundation ang route plan para sa motorcade agud makapreparar ang mga motorista kag makapangita sang alternatibo nga alagyan.
Pagdangay sa BCGC ground, may-ara sang patigayunon nga concert kag may fireworks display alas-12:00 sang kaagahon bilang opisyal nga pagbukas sang Masskara Festival 2024.
Paathag ni Robello nga Oktubre 8 pa lamang, naga-umpisa na sila sa pagpatigayon sang partial closure sa palibot sang Bacolod Public Plaza bangod madamo na sang nagaplastar sang kiosk kag mga baligya.
Sa pag-umpisa sang kapiestahan, patigayunon ang total closure sa dalan Rizal, San Juan, Gonzaga kag Gatuslao sa palibot sang plaza halin alas-4:00 sang hapon tubtob alas-5:00 sang aga.
Paathag ni Robello nga ginabuksan ang dalan sa adlaw bangod kun gab-i masami madamo ang nagalagaw sa festival site, agud indi man ma-ayawan ang mga motorista kag 25 tubtob 30 nga public transport route nga apektado.
Samtang partial closure lamang ang patigayunon sa dalan sa palibot sang BCGC./
Maga-umpisa naman ang pagsarado sa dalan Lacson sa Oktubre 26 tubtob 28./
Pasalig ni Robello nga may mga traffic enforcers man nga ma-assign sa mga routa agud maggiya sa mga motorista kun sa diin ang dalan nga sarang malabyan.
