Isa ka tumandok sang Bacolod City ang naggradwar bilang magna cum laude sa kurso nga Bachelor of Science in Economics sa University of the Philippines-Visayas.
Sa interview sang Bombo Radyo kay Catherine Trespuentes, isa na ka bugal para sa iya kag sa iya pamilya nga siya nakgradwar sa UP apang tuman pa gid ang kalipay sini sang siya nangin magna cum laude.
Suno diri, nakibot ini sa una sini nga nagsulod sa UP bangod madamo pa gid ini sang nakilala nga naggikan sa nagkalain-lain nga bahin sang pungsod kag didto sini natun-an ang kultura, gawi, kag pamatasan sang nagkalain-lain nga indibidwal, kag ini man nagbulig sa iya agud maintindihan ang nanari-sari nga komunidad.
Suno diri, kurso nga Bachelor of Science in Economics ang ikaduha lamang sini nga choice sa kurso bangod luyag sini nga mangin isa ka nurse, apang naluyagan na lamang sini ang iya kurso sa bulig man sang iya mga teachers kag classmates.
Naagyan man sini ang kabudlayan sa pagsulod sa economics nga kurso bangod ini nagtapos sa senior high sa kurso nga Accountancy, Business and Management (ABM).
Aminado ini nga nangin mabudlay ang pag-eskwela sini sa UP, bangod nga siya ang scholar ng bayan, kag indi mahapos ang pagsulod sa isa ka prestihiyoso nga institusyon.
Apisar sa kabudlayan, siya nagtinguha kag nagdevelop sang study habits nga nagbutang sa iya bilang magnacum laude.
Sa karun plano sini anay nga magpahuway matapos ang naagyan sini nga kabudalyan sa pag-eskwela , sa masunod plano sini nga magkuha sang masteral apang luyag man niya nga makigbahin sa Sangguaniang Kabataan council sa ila nga baranagy, agud mahatag sini sa komunidad ang iya natun-an sa ekonomiya.
Mensahe sini nga magtuon sang husto indi almang para sa kaugalingon kundi para man sa mga tawo nga nagasuporta kag sa komunidad nga nagakinahanglan sang bulig.
