Excited na ang isa ka Bacolodnon para sa natalana sini nga pagcompete sa World Championship of Performing Arts 2023 nga patigayunon sa Anahem, California sa bulan sang Hulyo.
Sa interview sang Bombo Radyo Bacolod kay Luke eid Villarta, residente sa Barangay Mandalagan, Bacolod City, antes ang partisipasyon subong nga tuig, siya ang nag-audition naman para sa World Championship of Performing Arts sang 2019, apang naabtan sang pandemic gani ini ang wala napatigayon.
May-ara naman sang virtual competition sang 2020, apang ginpili na sini nga indi nalang magpasakop bangod luyag sini sang experience sa pagperform mismo sa iban nga pungsod agud mapakita ang talento sang Pilipino.
Karun nga naghalog na ang restriksyon, siya ang liwat nga nag-audition sa Iloilo kun sa diin siya ang na-qualify nga magaperform para sa Gospel, Pop kag Broadway.
Samtang suno diri, magaperform man parehas sa iya ang isa pa ka Bacolodnon nga si Iya Tanio.
Paathag ni Villarta nga masobra 100 man ang delegates sang Pilipinas para sa kompetisyon kag ini ang para sa nagkalainlain nga category.
Suno diri may ara man kuntani nga participant ang Bacolod City para sa dance category apang bangod personal nga gastos ang pagpasakop sa kompetisyon, mahimo nabudlayan ang mga ini sa pagpangita sang sponsorship bangod sa kadamuon gani wala ang mga ini nagpadayun.
Sa pihak nga bahin, si Villarta ang una naman nga nakapasakop sa kompetisyon sang siya ang 9 anyos sa Brunei.
Suno diri, overseas Filipino worker (OFW) ang iya iloy, kag lamharun palang ini sang sila ang nagmigrate sa nasambit nga pungsod.
Paathag sini nga bangod gamay lang ang Filipino Community sa Brunei, kun sa diin ini nagdako, ginatutukan gid ang mga makit-an nga talento sang mga Pilipino.
Sumugod sadto, siya ang nagpartisipar na sa mga musical trainings, kun sa diin magluwas sa pagkanta, siya ang nagatukar man sang violen kag piano.
Siya ang nahatagan naman sang mga kahigayunan nga mangin voice actor kag Disc Jockey sa radyo.
Masami man ini nga kabahin sa mga theater play sa Brunei kun sa diin sadto nagdala na ini sang papel bilang Gasgas ukon ang ilaga nga abyan ni Cinderella samtang sa highschool siya ang nagdala naman sang papel ni Joseph sa “Joseph the Dreamer” sa Ateneo de Manila.
Aminado ini nga dako ang pressure sa pagcompete sa World Championship of Performing Arts 2023 apang excited naman ini apisar pa nga ginalauman na niya nga makasumpong ang iban nga contenders nga makabig na nga mga professional singers.
Paathag sini nga kalabanan sa ila nga mga performers ang wala nagacompete para sa fame ukon kwarta, kundi ang ginalagas sang mga ini amo ang validation bilang singer kag mga mahimo makuha nga mga recording deals.
Dugang pa ni Villarta nga handum sini nga makaangkon sang Singer Grand Champion ang syudad sang Bacolod kaangay sa iban nga mga lugar.
