Ginklaro sang Secretary Head sa Bacolod City Youth And Sports Development nga may pondo ang City Government para sa mga atleta nga nagpasakop sa Batang Pinoy 2023 kag Philippine National Game sa Pasig City.
Madumduman nga nag-umpisa ang kompetisyon Desyembre 17 kag natalana nga magtakop sa Desyembre 21.
Sa interview sang Bombo Radyo Bacolod kay Geraldine Montemayor, as of day 2 ang Bacolod Team ang nakakuha na sang apat ka gold medal nga ginalakipan sang isa sa swimming, isa sa athletics kag duha sa taekwondo.
Apat man ang silver medals nga ginalakipan sang duha sa swimming, isa sa arnis kag isa sa cycling kag may apat man ka bronze medal.
Apang sa pihak sini, nag-ibwal naman ang balita natuhoy sa isa ka Bacolodnon nga naghampang sa Athletics partikular na sa Discus Throw Under 20 category kag nakakuha sang bulawan nga medalya, apang ini ang nagrepresentar para sa Iloilo.
Pahayag sang atleta nga ini ang wala nakahampang para sa Bacolod City bangod ginkanselar sang ciudad ang entry para sa Discus Throw Under 20 category bangod sa kakulang sang pondo.
Apang panindugan ni Montemayor nga may-ara sang pondo ang City Government kag kalakip diri ang athletics.// Paathag sini nga may-ara sang guidelines para sa entries kun sa diin naghatag sang deadline nga Oktobre 21 para sa online submission sang mga requirements.
Samtang ang deadline naman sa submission sang hard copy sang mga requirements lakip na ang birth certificate, medical certificate, parents waiver kag iban pa ang Nobyembre 14 pinaagi sa shipping.
Pahayag ni Montemayor nga ang atleta nga nagpartisipar para sa Iloilo kag naka-gold ang wala nalakip sa delegasyon bangod apisar makapila na nga ginpahanumdom wala nakapasa ang coach sini sang requirements sa deadline.
Suno diri, indi man mahimo nga hulaton nila ang late nga requirements bangod tingob nila nga ginpadala ang para sa tanan nga estudyante.
Nagakahangawa ini nga kun nadelay kag ginhulat ang wala nakapasa, mahimo tanan nila nga mga atleta ang indi makahampang.
Paathag sini nga apisar nakapasa na sang requirements online kun wala sang original documents, sarang ma-invalidate ang entries sang mga player.
Sa karun wala pa nahibaluan kun paano nahimuan sang paagi sang Iloilo kag napasulod sa ila line up ang nasambitan nga atleta.
