Amat-amat na nga ginadala sa quarantine facility ang mga pumuluyo sang Bacolod City nga nakigbahin sa mass testing sang Agosto 28 tubtob Agosto 29, 2020 kag nagpositibo ang resulta.
Sa interview sang Bombo Radyo kay Bacolod City Vice Mayor El Cid Familiaran, ginpahayag sini nga Agosto 30, ginsugudan na nila ang pagpangdala sang mga pumuluyo sa quarantine facilities kag nagapadayon ini gihapon tubtub subong.
Aminado man ang bise-alkalde nga tuman ang pagsaka sang mga kaso sang virus sa ciudad sang tinalikdan nga mga inadlaw apang gin-athag sini nga ini ang bangud sa mass testing kag indi contact tracing.
Suno kay Familiaran, indi tingob ang pagpagwa sang resulta sang swab test kag amat-amat lang ini kada adlaw.
Gindugang man sini nga aprubado na sa session ang pagrenovate sang mga eskwelahan kag pagpangkay-o sang mga guba nga pasilidad kaangay sang mga bintana.
Suno diri, bangud nga wala man sang may nagagamit sang eskwelahan, ginpakaamayo sang gobyerno nga gamiton ini bilang quarantine facility agud may butangan sang mga nagpositibo sa virus.
Nagpahanumdum man ang bise-alkalde sa mga pumuluyo nga maghalong kag mangin vigilante bangud indi lahug-lahug ang COVID-19.
