Nagpaathag ang Bacolodnon nga nagpost sang viral video ni former Commission on Elections (COMELEC) Commisioner kag karun P3PWD partylist Representative Atty. Rowena Guanzon kun sa diin ginabuyayaw sini kag ginaturisok ang pila ka pumuluyo kadungan sa selebrasyon sang 49th Dinagsa Festival sang Domingo.
Suno kay Hyacinth Vallador, uploader sang video nga apat ka beses na sila nga nagapadulong sila nga mga taga-Bacolod sa ila mga himata sa Cadiz, para sa Dinagsa Festival.
Pahayag sini nga alas-4:22 sang hapon, nagatumpok sila nga 15 nga maghimata sang hinali maglabay si Guanzon nga ginawaswas sa alagyan ang iya nga bitbit nga baston bangod luyag sini nga hawanan ang iya alagyan.
Aksidente sini nga naigo ang fiance sang iya pakaisa, nga nag-upod lamang sa ila, apang sang ini ang nakibot gilayon nalang nga nagwara-wara si Atty. Guanzon.
Kasunod sini, iya na nga ginturisok, ginbuyayaw kag gintuslok-tuslok sang baston ang tiyo ni Vallador.
Wala naman sa ila sang nagabato kay Guanzon apang ginatambagan lamang ini bangod mabaskog ang iya pagpanuslok sang baston.
Ginapasinggitan man sini ang pamilya ni Vallador nga mahimo kaupod sa nagkastigo sa iya hinablos.
Nahibaluan nga kahapon, nagpost man si Guanzon nga sa kasagsagan sang Dinagsa Festival, may-ara sang naghakos kag naghurikap sa private part sang iya hibalos.
Bangod sa nakibot, gintiklod sini kag natumba ang nasambit nga persona, apang siya ang gilayon nga ginkastigo kag ginpulihan sang kapin pito tubtob walo ka persona nga may mga kaupod pa nga mga hubog nga kababainhan.
Suno kay Vallador, bangod sa kaugot sa natabo sa iya hinablos gani tuman ang kaakig sini samtang ginapangita ang may kahimuan sang pagpangbastos kag pagpangastigo.
Ginalantaw sini nga mahimo napa-ukpan lamang sila bangod sa kaakig sang anay alkalde.
Paathag naman ni Vallador nga ginpili sini nga magpaathag sa Bombo Radyo Bacolod bangod sa kahangawa ilabi na nga nagpaandam si Guanzon nga sila ang pagabalikan.
Suno diri, ginpili sini nga ivideo ang hitabo bangod nakita sini nga wala na sa husto ang nagakatabo kag indi nagakaigo nga sila ang maghipos na lamang bangod sila ang pigado kag puderoso ang kaatubang.
Apisar sa natabo, ang tiyo ni Vallador ang wala man sang komento, apang luyag lamang nila nga magpangayo sang pasaylo ang Kongresista.
Sa pihak nga bahin, sa post ni Atty Guanzon, ginpahayag man sini nga napapriso na sini ang duha ka persona nga imbulbado sa pagkastigo kag pagbastos sa iya nga hinablos.
