Dako ang pagpasalamat sang anay Top-10 sa Licensure Examination for Nursing sang 2016, matapos nga siya ang nakapasar sa bag-o lang natapos nga Physician’s Licensure Examination.
Suno kay Bryan Amiel Lapero Brey, 26 anyos, residente sa Barangay Mandalagan, Bacolod City, nga sa karun, tuman pa ka preska sa iya pinsar ang pagkadaog sa Physician’s Licensure Examination kag isa na sa karun ka lisensyado nga doktor.
Siya ang naggradwar sa La Consolacion College (LCC) Bacolod sang elementary kag highschool samtang siya ang nagtapos sang Nursing sa University of St. La Salle (USLS) – Bacolod sang 2016.
Aminado si Brey nga extra-curricular activities kag student council ang focus sini sang elementary kag highschool kag wala man ini ginapressure sang ginikanan nahanungod sa grades.
Samtang sa college na lamang ini nagpractice sang study habits.
Pahayag ni Brey nga wala gid niya ginhinulsulan nga siya ang nagkuha sang Nursing bangod gina-enjoy sini ang pagtuon samtang exposed naman ini sa ospital bangod sa balatian sang iya nga iloy nga Lupus kun sa diin sila ang nakaagi man nga masobra isa ka bulan nga pabalik-balik sa ospital.
Indi kaangay sa iban nga nagakuha sang nursing apang ang goal amo ang makatrabaho abroad, siya naman ang indi luyag nga mapalayo sa ila pamilya.
Matapos maggradwar sa apat ka tuig nga nursing course sang 2016, sila ang may-ara pa sang one-year internship sa hospital chores kun sa diin siya ang nagsulod sa Corazon Locsin Montelibano Memorial Regional Hospital (CLMMRH).
Suno pa diri, positibo ini nga siya ang nakapasar sa Licensure Examination for Nursing apang wala niya ginalauman nga siya ang mangin rank 10 bangod yara sa 10 mil ang numero sang takers.
Samtang paathag sini nga humalin sang naga-eskwela Nursing, sila ang exposed naman sa nagkalainlain nga mga clinical areas kasubong man sa kumunidad.
Pinaagi sini, nakita ni Brey ang sitwasyon sang mga pigado nga pumuluyo nga nagakinahanglan sang bulig medikal.
Sa pihak nga bahin, ginakabig man sini nga pinakadako nga challenge sadto ang makapila nga pagka-stroke sang iya iloy bangod ang balatian nga Lupus ang nagapanubo sang immune system.
Bangod Hulyo sila nakagraduate, halos duha ka bulan lamang ang tion sini sa pagreview bangod Oktobre ang schedule para sa Board Exam.
Pahanumdom sini sa iban pa nga mga estudyante nga bisan ano paman ang handum, ihatag lamang ang 110 porsyento sang ikasarang.
Apang sa tion nga indi ini gilayon malab-ot, indi gilayon buy-an ang handum kag tinguhaan nga malab-ot sa masunod nga kahigayunan.
Gikan sa mga estudyante sa USLS-Bacolod, yara sa 80 porsyento ang nakapasar sa Physician’s Licensure Examination nakaligad nga bulan sang Oktobre.
