Nakahamyang na sa ciudad sang Bacolod ang isa sa mga piloto sang helicopter sang Philippine Air Force nga naghugpaas sa Capas, Tarlac sang June 23.
Kahapon, naghugpa sa Bacolod Silay Airport ang eroplano nga ginkargahan sang bangkay ni Major Eraño Belen, 34-anyos, tumandok sang Dumaguete City, Negros Oriental apang nagapuyo na sa karon sa Barangay Aijis, Bacolod City.
Ginhatagan sang military honors ang pag-abot sang bangkay sang piloto.
Nagapatigayon sang night flight training sanday Belen kag lima ka iban pa nga crewmen sang naghugpaas ang Black hawk helicopter kun sa diin lunsay sila nagkalamatay.
Ini ang ginalakipan sang instructor pilot nga si Lieutenant Colonel Rexzon Pasco, student pilot nga sanday Major Jayrold Constantino kag Major Eraño Belen, instructor scanner nga si Master Sergeant Ronnie Reducto kag student scanners nga sanday Sergeant Maricar Laygo, kag Sergeant Leonardo Tandingan.
Ang ila bangkay ang gindala sa Clark Air Base sang Lunes kag ginhatagan sang full military honors.
Kahapon sang hapon, nagbisita si Defense Secretary Delfin Lorenzaza sa hamyang agud magpalab-ot sang simpatiya sa nalisdan nag pamilya kag ginpauli na ang mga ini sa ila nga mga hometown, kasunod sang hingyo sang tagsa ka pamilya.
Nagapadayon naman ang imbestigasyon sang Philippine Air Force angot sa helicopte crash.
